जालना जिल्ह्यातील भोकरदन शहरात काही दिवसांपूर्वी अभियानाखाली लावण्यात आलेली झाडे आता वाळू लागली आहेत. जालना रोडवरील विश्रामगृह ते ग्रामीण दवाखाना चौकातील भिंतीवर आईच्या नावाने अनेक लोकांनी झाडे लावली होती. सुरुवातीला मोठ्या उत्साहात झालेला हा सोहळा आता दुर्लक्षामुळे संकटात सापडला आहे. या झाडांची योग्य काळजी न घेतल्याने ती सुकून नष्ट होण्याच्या मार्गावर आहेत.
शहरातील या भागामध्ये १०० पेक्षा जास्त झाडे लावण्यात आली होती. प्रत्येक झाडाला टणक कुंपण घालण्यात आले होते आणि भिंतीवर आईचे नाव मोठ्या अक्षरात लिहिले होते. पण या वर्षी पाऊस अत्यंत कमी पडल्याने आणि पाण्याचे दुर्भिक्ष असल्याने उन्हाळ्यासारखी परिस्थिती तयार झाली आहे. पिण्याच्या पाण्याची टंचाई असताना या झाडांना पाणी देणे पूर्णपणे थांबले आहे, ज्यामुळे लहान लहान झाडे सुकून गेली आहेत.
रस्त्यावरून दररोज हजारो लोक आणि अधिकारी ये-जा करतात, पण कोणाचेही या झाडांकडे लक्ष नाही. भिंतीवर नावे तशीच दिसत आहेत, पण त्याखालील झाडे मात्र वाळून गेली आहेत. स्थानिक नागरिकांनी आणि प्रशासनाने या गंभीर विषयाकडे लक्ष देऊन झाडांना पाणी देण्याची सोय करावी, अशी मागणी आता पुढे येत आहे.
ज्या लोकांची झाडे पूर्णपणे जळाली आहेत, त्यांनी तिथे नवीन झाडे लावून ती जगवणे गरजेचे आहे. आईच्या स्मृतीप्रीत्यर्थ लावलेली ही झाडे वाचवणे आणि निसर्गाचे रक्षण करणे हे आता सर्वांसमोर मोठे आव्हान बनले आहे. नियमित पाणी दिल्यास शिल्लक राहिलेली झाडे पुन्हा जगू शकतील, असा विश्वास व्यक्त होत आहे.
